ސިނގިރޭޓާއި ބިޑިން ނަގާ އިމްޕޯޓް ޑިއުޓީ ހަތަރު ރުފިޔާއަށް ކުޑަކުރުމަށްޓަކައި އެކްސްޕޯޓް އިމްޕޯޓްގެ ގާނޫނަށް އިސްލާހު ގެނައުމުގެ ބިލެއް ސަރުކާރުން ރައްޔިތުންގެ މަޖިލީހަށް ހުށަހަޅައިފި އެވެ.

ސަރުކާރުން މި ބިލު ހުށަހެޅި މައިގަނޑު އެއް މަގުސަދަކީ ދުންފަތުގެ ބާވަތްތަކުން ނަގާ ޑިއުޓީގެ މިންވަރު މުރާޖައާ ކުރުމެވެ. މި ބިލުގައި ހުށަހަޅާފައިވާ ގޮތުން، މިހާރު ސިނގިރޭޓަކުންނާއި ބިޑިއަކުން ނަގަމުން އަންނަ އަށް ރުފިޔާގެ ޑިއުޓީ ހަތަރު ރުފިޔާއަށް ކުޑަކުރުމަށާއި، އޭގެ އެޑްވެލޮރަމް ޑިއުޓީގެ ގޮތުގައި ނަގާ އަދަދު 50 ޕަސެންޓުން 30 ޕަސެންޓަށް ދަށްކުރުމަށް ވަނީ ހިމަނައިފަ އެވެ. މި ބިލުގެ ފުރަތަމަ ކިއުން ރައްޔިތުންގެ މަޖިލީހުގެ މާދަމާގެ ޖަލްސާއަށް ވަނީ އެޖެންޑާ ކޮށްފަ އެވެ.

މި އިސްލާހުގެ ތެރެއިން ދުންފަތުގެ އިސްތިއުމާލު ކުރުން ހުއްޓާލުމަށް މަސައްކަތްކުރާ ފަރާތްތަކަށް ލުޔެއް ދިނުމަށް ސަރުކާރުން ވަނީ ނިންމައިފަ އެވެ. އެގޮތުން، ދުންފަތުގެ އިސްތިއުމާލު ކުރުމުން ދުރުވުމަށް ބޭނުންކުރާ ނިކޮޓިން ޗުއިންގަމް، ނިކޮޓިން ޕެޗް އަދި އެފަދަ އެހެނިހެން ބާވަތްތައް އިމްޕޯޓް ކުރުމުގައި ޑިއުޓީ ދައްކަން ނުޖެހޭ ގޮތަށް ހަމަޖެއްސުމަށް މި ބިލުގައި ހުށަހަޅާފައިވެ އެވެ. މިއީ ދުންފަތުގެ ވަބާއިން ސަލާމަތްވުމަށް މަސައްކަތްކުރާ ފަރާތްތަކަށް ލިބިގެންދާނެ އިތުރު ހިތްވަރަކަށް ވާނެ ކަމަށް ސަރުކާރުން ގަބޫލުކުރެ އެވެ.

ސިނގިރޭޓާއި ބިޑީގެ އިތުރުން، ރޯކުރުމަކާ ނުލައި ހޫނުކޮށްގެން ބޭނުންކުރާ ދުންފަތުގެ އުފެއްދުންތައް ނުވަތަ ހީޓް ޓޮބޭކޯ ޕްރޮޑަކްޓްސް އިން ނަގާ ޑިއުޓީއަށް ވެސް ބަދަލު ގެނައުމަށް ވަނީ ހުށަހަޅައިފަ އެވެ. މިހާރު މިފަދަ އުފެއްދުންތަކުން ނަގަމުން އަންނަ 50 ޕަސެންޓްގެ އެޑްވެލޮރަމް ޑިއުޓީ 30 ޕަސެންޓަށް ދަށްކުރުމަށާއި، ސްޓިކަކުން ނަގާ އަށް ރުފިޔާގެ ޑިއުޓީ ހަތަރު ރުފިޔާއަށް ކުޑަކުރުމަށް މި ބިލުގައި ހިމަނާފައިވެ އެވެ.