ނިދާފައި އޮންނައިރު ބާލީހަށް ކުޅު ފައިބައިފައި ހުރުމަކީ އަހަރެމެންގެ ތެރެއިން ގިނަ މީހުންނަށް ތަޖުރިބާ ކުރެވިފައިވާ، އަދި ބައެއް ފަހަރު ލަދުގަންނަ ކަމެކެވެ.

ނަމަވެސް، ސިއްހީ މާހިރުން ވިދާޅުވާ ގޮތުގައި ނިދީގައި ކުޅު އައުމަކީ އާދައިގެ ކަމަކަށް ވީނަމަވެސް، ބައެއް ހާލަތްތަކުގައި މިއީ ސިއްހީ ބޮޑު މައްސަލައެއްގެ ނިޝާނަކަށް ވެސް ވެދާނެ އެވެ.

ނިދީގައި ކުޅު އަންނަން މެދުވެރިވާ އާދައިގެ ސަބަބުތައް

އަހަރެމެން ހޭލައި ތިބޭއިރު، އަނގައިގައި އުފެދޭ ކުޅު އަމިއްލައަށް ދިރުވާލެވެ އެވެ. ނަމަވެސް ނިދުމުން ކަރުތެރެއާއި އަނގައިގެ މަސްތައް ރިލެކްސްވެ، ދިރުވުމުގެ ހަރަކާތްތައް މަޑުޖެހެ އެވެ.

  • އަރިއަކަށް ނުވަތަ ބަނޑުވަތަށް ނިދުން: މިއީ ކުޅު އައުމުގެ އެންމެ އާންމު ސަބަބެވެ. ގްރެވިޓީ ނުވަތަ ދަމާބާރުގެ ސަބަބުން އަނގަ ހުޅުވިފައި ހުންނަނަމަ ކުޅު ބޭރަށް ފައިބައިގެން ދެ އެވެ.
  • އަނގައިން ނޭވާލުން: ނޭފަތް ބަންދުވުމުގެ ސަބަބުން (އެލާޖީ، އަރިއަދަފުސްގެ ސަބަބުން) އަނގައިން ނޭވާލާން ޖެހުމުން އަނގަ ހުޅުވި ކުޅު އާދެ އެވެ.
  • ގަދައަށް ނިދުން: އަރާމު މާހައުލެއްގައި ވަރަށް ފުންކޮށް ނިދޭ ވަގުތު ތަކުގައި މަސްތައް މުޅިން ރިލެކްސްވުމުން ކުޅު އައުން އިތުރުވެ އެވެ.

ސަމާލުވާންޖެހޭ ސިއްހީ މައްސަލަތައް

ނިދީގައި ކުޅުއައުން އާދަޔާ ހިލާފަށް އިތުރުވެ، ދިގުލައިގެންދާނަމަ އެއީ ތިރީގައިވާ ސިއްހީ މައްސަލަތަކުގެ ސަބަބުން ދިމާވާ ކަމަކަށް ވެދާނެއެވެ:

  • ސްލީޕް އަޕްނިއާ: ނިދިފައި އޮންނައިރު ނޭވާހިއްލުމާއި، ނޭވާކުރުވުން ނުވަތަ ވަގުތީ ގޮތުން ނޭވާ ހުއްޓޭ މައްސަލަ އެވެ. މިއީ ގަދައަށް ގުގުރި ދެމުމާއެކު އަނގައިން ނޭވާ ލާންޖެހި، ކުޅު އައުމަށް މަގުފަހިކުރާ ކަމެކެވެ.
  • ނާރުގެ މައްސަލަތައް: ޕާކިންސަންސް ބަލި، ސްޓްރޯކް، ނުވަތަ ސެރެބްރަލް ޕާލްސީ ފަދަ ނާރުތަކުގެ މައްސަލަތަކުގެ ސަބަބުން އަނގަޔާއި ކަރުތެރޭގެ މަސްތައް ކޮންޓްރޯލް ކުރަން އުނދަގޫވުން.
  • އެސިޑިޓީ: މައިދާގައި ހުންނަ އެސިޑް ކަރުތެރެއަށް އައުމުން، އެސިޑް ސާފު ކުރުމަށްޓަކައި ހަށިގަނޑުން އިތުރަށް ކުޅު އުފެއްދުން.

މިކަން ހައްލު ކުރުމަށްޓަކައި ނިދަން އޮންނަ ގޮތް އިރުއިރުކޮޅުން ބަދަލު ކުރުމާއި ނިދުމުގެ ކުރިން ނޭފަތް ސާފު ކުރުން އަދި ގިނައިން ފެން ބުއިން ފަދަ ކަންކަން ކުރެވިދާނެ އެވެ.

ނިދީގައި ކުޅު އައުމާއެކު ގަދައަށް ގުގުރި ދެމި ހޭލެވޭއިރު ވަރުބަލިކަން އިހުސާސްވުން، ނުވަތަ ކާތަކެތި ދިރުވަން އުނދަގޫވުން ފަދަ އަލާމާތެއް ފެންނަނަމަ ލަސްނުކޮށް ޑޮކްޓަރެއްގެ އިރުޝާދު ހޯދުން މުހިންމެވެ.