ރުޅިއައުމަކީ އިންސާނީ ތަބީއަތުގައި ހުންނަ، ކޮންމެ މީހަކަށްވެސް އިހުސާސްވާނެ އާންމު އިހުސާސެކެވެ. ނަމަވެސް، މިންވަރަށްވުރެ ބޮޑަށް ރުޅި އައިސް، އެ ރުޅި ކޮންޓްރޯލް ނުކުރެވޭ ހިސާބަށް ދިއުމަކީ ނަފްސާނީ އަދި ޖިސްމާނީ ސިއްހަތަށް ބޮޑެތި ގެއްލުންތަކެއް ލިބިދާނެ ކަމެކެވެ.
ނަފްސާނީ ބަލިތަކުގެ ހާއްސަ ޑޮކްޓަރު ޑރ. އަވީނާ ގުޕްތާ ވިދާޅުވާ ގޮތުގައި، ރުޅި ކޮންޓްރޯލް ކުރަން އުނދަގޫވެ، ދިރިއުޅުމުގެ އާންމު ކަންކަމަށް އޭގެ ނުބައި އަސަރު ކުރާނަމަ، އެއީ ޕްރޮފެޝަނަލް ނަފްސާނީ އެހީ ނުވަތަ ތެރަޕީ ހޯދަންޖެހޭ ކަމެކެވެ.
ރުޅީގެ މައްސަލަތަކުގައި ތެރަޕީ ނުވަތަ ކައުންސިލިންގ ހޯދަންޖެހޭ 6 މުހިންމު އިޝާރާތެއް ޑރ. އަވީނާ ވަނީ ހިއްސާ ކުރައްވާފަ އެވެ.
1. ކުޑަކުޑަ ކަމަކުން ކުއްލިއަކަށް ގަދައަށް ރުޅިއައުން
އާންމު ގޮތެއްގައި ބޮޑު ކަމަކާ ނުލައި، ވަރަށް ކުޑަކުޑަ ކަމަކާ ހުރެ ކުއްލިއަކަށް ކޮންޓްރޯލް ނުކުރެވޭ ވަރަށް ރުޅިއައިސް ބޭރު ވުމަކީ ސަމާލު ވާންޖެހޭ ކަމެކެވެ. މިއީ އަމިއްލަ އިހުސާސްތައް މެނޭޖް ކުރުމުގައި މައްސަލަތަކެއް ހުރިކަމުގެ އިޝާރާތެކެވެ.
2. ގުޅުންތަކަށް ނުބައި އަސަރުކުރުން
ރުޅީގެ ސަބަބުން އާއިލާ، ރަހުމަތްތެރިން، ނުވަތަ ވަޒީފާގެ މާހައުލުގައި އުޅޭ މީހުންނާ އޮންނަ ގުޅުން ގޯސްވާނަމަ އެއީ ބޮޑު މައްސަލަ އެކެވެ. ރުޅިއަންނަ ވަގުތު ބުނެވޭ ބަސްތަކާއި ކުރެވޭ ކަންކަމުގެ ސަބަބުން އެހެން މީހުންގެ ހިތުގައި ޖެހި، ގުޅުންތައް ރޫޅެން ފެށުމަކީ ތެރަޕީ ބޭނުންވާ ކަމުގެ އަލާމާތެކެވެ.
3. ތަކެއްޗަށް ގެއްލުން ދިނުން ނުވަތަ އަނިޔާވެރިވުން
ރުޅި އަންނަ ވަގުތު ގޭގައި ހުންނަ ތަކެތި އުކައި ހަލާކު ކުރުން، ފާރުގަޔާއި އެއްޗެހީގައި ޖެހުން، ނުވަތަ އެހެން މީހުންގެ ގައިގައި އަތްލައި އަނިޔާ ކުރަން އުޅުމަކީ ވަރަށް ނުރައްކާތެރި ހާލަތެކެވެ. މިފަދަ އަމަލުތަކުގެ ސަބަބުން އަމިއްލަ ނަފްސަށާއި އެހެން މީހުންނަށް ބޮޑެތި އަނިޔާތައް ލިބިގެންދެ އެވެ.
4. ރުޅި އައުމަށްފަހު ދެރަވުމާއި ކުށްވެރިކަމުގެ އިހުސާސްވުން
ރުޅިގަނޑު މައިތިރި ވުމަށްފަހު ކުރެވުނު ކަންތައްތަކާ މެދު އިންތިހާއަށް ދެރަވެ، އަމިއްލަ ނަފްސު ކުށްވެރި ކުރެވޭނަމަ އެއީ ސިކުނޑިއަށް ވަރަށް ބޮޑު ބާރެއް ކުރާ ކަމެކެވެ. އަމިއްލަ އަމަލުތައް ހުރިގޮތުން ދެރަވި ނަމަވެސް، އަނެއްކާވެސް އެކަން ތަކުރާރު ވަނީނަމަ އެހީތެރިކަން ހޯދަންޖެހެ އެވެ.
5. ޖިސްމާނީ ސިއްހަތަށް އަސަރުކުރުން
އަބަދު ރުޅިއައިސްފައި ހުރުމުގެ ސަބަބުން ހަށިގަނޑުގެ ސްޓްރެސް ހޯމޯންތައް މަތިވެ އެވެ. މީގެ ސަބަބުން ލޭގެ ޕްރެޝަރު މަތިވުން، ބޮލުގައި ރިއްސުން، ހިތުގެ ތެޅުން އަވަސްވުން، އަދި ނިދަން އުނދަގޫވުން ފަދަ ޖިސްމާނީ މައްސަލަތައް ދިމާވާން ފަށަ އެވެ.
6. ހިތުގައި އަބަދު ހަސަދައާއި ރުޅިވެރިކަން ބޭއްވުން
ކުރިން ދިމާވެފައިވާ ކަންކަމާ މެދު އަބަދު ފިކުރުކޮށް، ހިތުގައި ރުޅިވެރިކަމާއި ހަސަދަވެރިކަން ދިގު މުއްދަތަކަށް ދަމަހައްޓައިގެން އުޅުމަކީ އަމިއްލަ ނަފްސާނީ ހަމަޖެހުން ނަގާލާ ކަމެކެވެ. މީގެ ސަބަބުން އުފާވެރިކަމާ ދުރުވެ، މީހާ އަބަދު މާޔޫސްކަމުގެ ތެރޭގައި އުޅެން ޖެހެ އެވެ.
ރުޅި މެނޭޖް ކުރުމަށް ތެރަޕީއެއް ނުވަތަ ކައުންސިލިންގއެއް ހޯދުމަކީ ބަލިކަށިކަމެއް ނޫނެވެ. އޭގެ ބަދަލުގައި، އެއީ އަމިއްލަ ނަފްސާނީ ދުޅަހެޔޮ ކަމަށާއި، ގުޅުންތައް ރައްކާތެރި ކުރުމަށްޓަކައި އެޅޭ ވަރަށް ބުއްދިވެރި އަދި މުހިއްމު ފިޔަވަޅެކެވެ.
