ބޮލީވުޑްގެ މަޝްހޫރު އެކްޓަރު ގޯވިންދާގެ އަންހެނުން ސުނީތާ އަހޫޖާއަކީ އަބަދުވެސް އޭނާގެ ތެދުވެރިކަމާއި ސީދާކޮށް ވާހަކައް ދެއްކުމުގެ ސަބަބުން އާންމުންގެ ބޮޑު ސަމާލުކަމެއް ލިބެމުންދާ މީހެކެވެ.

ދާދި ފަހުން ދިން އިންޓަވިއުއެއްގައި ސުނީތާ ވަނީ "ލޮކް އަޕް" ރިއަލިޓީ ޝޯއިން އޭނާ ވަކިވި ވަގުތުގެ ތަޖުރިބާއާއި، އެއަށްފަހު ދިރިއުޅުމަށް އައި ބަދަލުތަކާ މެދު އަސަރުގަދަ ވާހަކަތަކެއް ހިއްސާކޮށްފަ އެވެ.

ޝޯއިން ވަކިވެގެން ދާން ޖެހުނު ވަގުތަކީ އަސަރުން ފުރިގެންވީ ވަގުތެއްގެ ގޮތުގައި ސުނީތާ ސިފަކުރި އެވެ. އަމިއްލަ އަރާމު ދިރިއުޅުމާއި އާއިލާއާ ދުރުގައި، ހަރުކަށި އުސޫލުތަކެއްގެ ތެރޭގައި ދުވަސްތަކެއް ހޭދަ ކުރުމަށްފަހު ޝޯއިން ނުކުންނަން ޖެހުމުން، އެކަމުން ލިބުނު އެންމެ ބޮޑު ފިލާވަޅަކީ ކެތްތެރިކަމާއި ނަފުސާނީ ވަރުގަދަކަން ކަމަށް އޭނާ ބުންޏެވެ.

"ޝޯއިން ވަކިވެގެން ނުކުތް ނަމަވެސް، އެ ތަޖުރިބާއަކީ ދިރިއުޅުމުގައި ލިބުނު ވަރަށް ބޮޑު އެހީއެއް. އެކަކު އަނެކަކަށް އިޙްތިރާމްކުރުމާއި، ކޮންމެފަދަ އުނދަގޫ ހާލަތަކަށްވެސް އަމިއްލަ ނަފުސު ހޭނުވުމުގެ މުހިންމުކަން ވަރަށް ބޮޑަށް އިހުސާސްވި،" ސުނީތާ ހާމަކުރި އެވެ.

ޝޯއިން ވަކިވުމާއެކު، އެތަނުގައި ތިބި އެހެން ބައިވެރިންނާ އޮތް ގުޅުމާއި، އެ މާހައުލުން ދަސްވި ކަންތައްތަކަކީ މުޅި ދިރިއުޅުމުގައިވެސް ބޭނުންކުރެވޭނެ މުހިންމު ފިލާވަޅުތަކެއްގެ ގޮތުގައި އޭނާ ފާހަގަކުރި އެވެ.

ޝޯގެ އުނދަގޫ މާހައުލުން ނުކުމެވުމަށްފަހު، ސިއްހަތަށް އިތުރަށް ސަމާލުކަން ދިނުމުގެ މުހިންމުކަން ވިސްނުނު ކަމަށް ސުނީތާ ބުންޏެވެ.

އުމުރުން ދުވަސް ވަމުންދާއިރު، ގޯސް ކާނާއާ ދުރުވެ، ކަސްރަތު ކުރުމާއި، ސިކުނޑީގެ ހަމަޖެހުމަށް އިސްކަން ދިނުމަކީ ދުޅަހެޔޮ ދިރިއުޅުމަކަށް ކޮންމެހެން ބޭނުންތެރި ކަމެއްކަމަށް އޭނާ ބުންޏެވެ. އަމިއްލަ ނަފުސަށް ވަގުތުދީ، އުފަލުގައި ހުރުމަކީ ބަލިތަކުން ދުރުހެލިވުމަށް އޮތް އެންމެ ބޮޑު ފަރުވާކަމަށްވެސް އޭނާ ގަބޫލުކުރެ އެވެ.

ޝޯއިން ވަކިވުމަށްފަހު ކުރިއަށް ހުރި ރޭވުންތަކާ މެދު ވާހަކަ ދައްކަމުން، ސުނީތާގެ ފިރިހެން ދަރިފުޅު ޔަޝްވަރުދަން އަހޫޖާ ބޮލީވުޑަށް ނުކުތުމަށް ތައްޔާރު ވަމުންދާތީ އެކަމާ މެދު ވާހަކަ ދެއްކި އެވެ.

ދަރިފުޅާއެކު އެކްޓިންއިން ފެނިދާނެތޯ ކުރެވުނު ސުވާލަށް ޖަވާބު ދެމުން ސުނީތާ ބުނީ އެކަމާ މެދު އަދި ވަކި ގޮތެއް ނުނިންމާ ކަމަށެވެ. ނަމަވެސް، ރަނގަޅު އަދި ކަމުދާ ފަދަ ސްކްރިޕްޓެއް ލިބިއްޖެނަމަ، ދަރިފުޅާއެކު ފިލްމަކުން ފެނުމަކީ އެކަށީގެންވާ ކަމެއް ކަމަށް އޭނާ ބުންޏެވެ.

ޔަޝްވަރުދަން ފިލްމީ ދާއިރާއަށް ނުކުންނަނީ ވަރަށް ބޮޑަށް ތައްޔާރު ވެގެން ކަމަށާއި، ގޯވިންދާ ފަދައިން އޭނާގެ ދަރިފުޅުވެސް ބެލުންތެރިންގެ ލޯބި ހޯދާނެ ކަމުގެ ފުރިހަމަ އުއްމީދު އެބިއޮތް ކަމަށް ސުނީތާ ވަނީ ބުނެފަ އެވެ.